Farg‘onada O‘zbekiston Respublikasi Prezidenti tomonidan belgilab berilgan yangi tizim asosida aholining tomorqa va ijara yerlaridan samarali foydalanish orqali daromadlarini oshirish chora-tadbirlari mavzusida respublika ko‘rgazmali seminari bo‘lib o‘tdi.

Seminarda Respublika ishchi guruhi a‘zolari, viloyat sektorlari rahbarlari, viloyat hokimining o‘rinbosarlari, viloyat boshqarmalari boshliqlari, shahar va tuman hokimlari, ularning tegishli o‘rinbosarlari, Mahallalar uyushmalari rahbarlari, shahar-tuman kambag‘allikni qisqartirish va bandlikka ko‘maklashish bo‘limi boshliqlari, tijorat banklari rahbarlari, og‘ir toifadagi shahar va tumanlardagi hokim yordamchilari hamda OAV vakillari ishtirok etdi.

Dastlab Quva tumanidagi "Karkidon" suv ombori hududida barpo etilayotgan "yashil belbog‘" loyihasi doirasida daraxt ekish tadbiri o‘tkazildi. Bu yerda 270 gektar maydonda 108 mingta 15 turdagi ko‘chatlar ekilishi rejalashtirilgan. Ishtirokchilar daraxt ekib, ezgu ishga o‘z hissalarini qo‘shdilar.

Duolar qilinib, yurtga tinchlik-osoyishtalik, boshlangan ishlarga xayru barakotlar tiladilar.

Shundan so‘ng Quva tumanidagi "Qaqir" MFYda "Obod xonadon tomorqadan boshlanadi" shiori ostida hududni namunali mahallaga aylantirish borasida amalga oshirilayotgan ishlar bilan tanishildi.

Mahalla aholisi 5 308 nafarni tashkil etib, 865 ta xonadonlar, 1445 ta oilalar bor. Ijtimoiy reestrda 66 ta oila mavjud. Gulchilik, ko‘chatchilik va issiqxonaga ixtisoslashgan bo‘lib, gulchilik bilan 450 ta, ko‘chatchilik bilan 250 ta, issiqxona bilan 100 ta xonadon shug‘ullanmoqda.

Shu erda Respublika ishchi guruhi rahbarlari hamda viloyat hokimi Xayrullo Bozorov shahar-tumanlarda faoliyat olib borayotgan hokim yordamchilari bilan suhbatlashib, ularning aholi bandligini ta‘minlash bo‘yicha amalga oshirayotgan chora-tadbirlarini eshitdilar. O‘z ishlarini tizimli yo‘lga qo‘yish va yanada jonlantirish yuzasidan ko‘rsatma va topshriqlar berildi.