Quva tumanining og‘ir toifadagi “Boyiston” MFYda tomorqachilikni rivojlantirish, bu yo‘l orqali har bir oilani daromadli qilish uchun katta imkoniyat bor. Ko‘rgazmali seminar ishtirokchilari bu yerda tomorqadan samarali foydalanish bo‘yicha olib borilayotgan ishlarni ko‘zdan kechirdilar.

Ko‘chatchilik va dehqonchilikka ixtisoslashgan mazkur mahallada 5 mingdan ziyod aholi istiqomat qiladi. Ko‘chatchilik bilan 550 ta, limonchilik bilan 37 ta, gulchilik bilan 50 ta xonadon a‘zolari shug‘ullanib kelmoqda.

Seminar davomida “Boyiston” mahallasi hamda viloyatda barcha mahallalarning ixtisoslashuvi, “Bir mahalla – bir mahsulot” tamoyilini joriy etish, mahsulotlarni ichki bozorga va eksportga chiqarish, bozorlarda narx-navoni kamaytirish, mahallaning eksport salohiyatini oshirish bo‘yicha taqdimot ham o‘tkazildi.

Tomorqa va dehqon xo‘jaliklari uchun qishloq xo‘jaligi hamda qayta ishlash yo‘nalishidagi mini texnologiyalar ko‘rgazmasi bilan tanishildi.

Kunning ikkinchi yarimida seminar qatnashchilari uchun “Qoraqum” mahallasidagi fermer, dehqon xo‘jaliklari va aholi tomorqalariga agro xizmatlar ko‘rsatish markazida tomorqaga xizmat ko‘rsatish, resurslar ta‘minoti (urug‘lik, ko‘chatlar, meneral o‘g‘itlar, kimyoviy vositalar) va tomorqa texnikalari hamda agregatlari ko‘rgazmasi tashkil etildi.

Aholiga qulaylik yaratish maqsadida hududlarda mahallalar kesimida shunday markazlarni ko‘paytirish zarurligi ta‘kidlandi.

Tumanlardagi mahallalardan kelgan yurtdoshlarimizga tomorqalar va ijara erlarida foydalanishlari uchun lizing asosida berilgan mini traktorlarning kalitlari topshirildi. Bunday jarayonlarni kengaytirish orqali yangi daromad manbalarini yaratish barobarida ekin erlaridan samarali foydalanish choralarini ko‘rish yuzasidan tavsiyalar aytildi. Lizing asosida mini traktorlar olishda yaratilgan imkoniyat va imtiyozlar haqida ma‘lumotlar berildi.

“Qoraqum” MFY drayveri bo‘lgan gulchilik va ko‘chatchilikdagi ilg‘or tajribalar bilan tanishildi.

Mahallada ko‘chatchilik bilan 471 ta, gulchilik bilan 359 ta xonadon shug‘ullanayotgan bo‘lib, bu erda tashkil etilgan atirgulchilik kooperasiyasi faoliyati hamda dehqon xo‘jaliklarida sabzavot va ko‘chatlar etishtirish jarayonlari haqida mehmonlarga ma‘lumotlar berildi.

Shu erning o‘zida aholiga ijara asosida ajratilgan yer maydonlaridan foydalanish samaradorligini oshirish bo‘yicha qilingan ishlarga to‘xtalib o‘tildi.

"Bir mahalla – bir mahsulot” tamoyili asosida Quva tumanidagi qolgan mahallalarda ham gulchilikni rivojlantirish bo‘yicha mas‘ullarga topshiriqlar berildi.