Toshloq tumani hokimi Abduqahhor Djurabayev navbatdagi fuqarolar qabulini o‘tkazdi. Qabul davomida tuman aholisining turli masalalar bo‘yicha murojaatlari eshitilib, ularni hal etish yuzasidan tegishli chora-tadbirlar belgilandi.
Qabul jarayonida kommunal xizmatlar, ijtimoiy himoya, uy-joy va yer masalalari, tadbirkorlikni rivojlantirish hamda boshqa dolzarb muammolar muhokama qilindi. Har bir murojaat yuzasidan mutasaddi idora va tashkilot rahbarlariga tegishli topshiriqlar berildi.
Tuman hokimi fuqarolarning muammolarini tezkor va samarali hal etish muhimligini ta’kidlab, har bir murojaat doimiy nazoratga olinishini bildirdi.
Qabul davomida murojaat qilgan fuqarolar o‘zlarini qiynayotgan masalalarga yechim topilgani va hokimlikka bevosita murojaat qilish imkoniyati yaratilganidan mamnun ekanliklarini bildirishdi.
Toshloq tumani hokimligi bunday qabullarni muntazam o‘tkazish orqali aholi muammolarini joyida hal etish va fuqarolarning davlat organlariga bo‘lgan ishonchini mustahkamlashga qaratilgan sa’y-harakatlarni davom ettirishini ma’lum qildi.