Sohibqiron Amir Temur tavalludining 689 yilligi munosabati bilan Farg‘ona tumani ixtisoslashtirilgan maktabida bayram sayli tadbirlari tashkil etildi. Tadbir davomida faxriylar ishtirokida bir qator sport musobaqalari, jumladan arqon tortish, kamondan o‘q otish, polvon toshini ko‘tarish, kurash, armrestling hamda shaxmat bo‘yicha bellashuvlar tashkil etildi. Ushbu sport tadbirlari ishtirokchilarda katta qiziqish uyg‘otib, bayramga alohida shukuh bag‘ishladi. Shuningdek, maktabning “Vatan tayanchi” yoshlar harbiy guruhi a‘zolari tomonidan ko‘rgazmali chiqishlar namoyish etilib, yoshlarning harbiy tayyorgarligi, intizomi va Vatanga sadoqat tuyg‘ulari namoyon etildi. Mazkur tadbir Sohibqiron Amir Temurning boy tarixiy merosini yoshlarga etkazish, ularning ma‘naviy-axloqiy tarbiyasini yuksaltirishga xizmat qildi. Bayram ishtirokchilari buyuk sarkardaning hayoti, faoliyati va yurt taraqqiyotiga qo‘shgan ulkan hissasi haqida chuqur taassurotlarga ega bo‘lishdi.