“Mushtum” jurnalining ijtimoiy tarmoqlardagi sahifalarida O‘zbekiston tumanidagi 26-umumta’lim maktabining “Buzuqo‘rg‘on“ mahallasida joylashgan filialini ta’mirtalabligiga oid feleton (videomaterial) e’lon qilindi.

Mazkur maktab filialining binosi 1986 yilda pishgan g‘ishtdan, tomi yopma plitalardan iborat tipda 120 o‘quvchi o‘rniga mo‘ljallab qurilgan. Ayni kunlarda muassasada 86 nafar boshlang‘ich sinf o‘quvchilari tahsil olishmoqda.

Buzuqo‘rg‘on MFY hududida 270 nafar maktab yoshidagi bolalar mavjud bo‘lib, ulardan 86 nafari, ya’ni 1-4 sinf o‘quvchilari ayni maktab filiali binosida, qolgan yuqori sinf o‘quvchilari esa maktabning asosiy binosi joylashgan Ziyo Nursux mahallasidagi ta’lim maskaniga qatnab tahsil olishmoqda.

Ayni kunlarda maktabda dastlabki bosqich obodonlashtirish-ta’mirlash ishlariga kirishildi. Xususan, maktab hududidagi yaroqsiz holdagi devor buzib tashlanib, muassasa elektr tarmoqlaridagi nosoz nuqtalar yangisiga alishtirilmoqda.

O‘quvchilar sig‘imini hisobga olgan holda kelgusida ta’lim maskanini kengaytirib, yangidan qurilish ishlarini amalga oshirish yuzasidan tegishli hujjatlarni tayyorlash jarayonlari ham boshlandi.