So‘x tumanidagi harbiy qismda Davlat xavfsizlik xizmatining Chegara qo‘shinlari harbiy xizmatchilari uchun qurib bitkazilgan chegara qo‘riqlash vzvodining foydalanishga topshirish marosimi bo‘lib o‘tdi.

Tadbirda viloyat hokimi, viloyat harbiy-ma‘muriy sektori rahbari Xayrullo Bozorov, viloyat sektorlari hamda huquq-tartibot va xavfsizlikni ta‘minlovchi organlari rahbarlari, harbiy xizmatchilar, ularning oila-a‘zolari va jamoatchilik vakillari ishtirok etdi.

Viloyat hokimi harbiy xizmatchilarni yaqinda keng nishonlangan Vatan himoyachilari kuni bayrami bilan samimiy qutladi. Davlatimiz rahbari tomonidan harbiy-ma‘muriy sektorlarga belgilab berilgan vazifalar ijrosi doirasida barpo etilgan mazkur harbiy shaharcha harbiylarning o‘z xizmat vazifalarini xotirjam, ko‘ngillari to‘q bo‘lib bajarishlariga, yanada sadoqat va vatanparvarlik hissi bilan jonajon Vatanimiz sarhadlarini qo‘riqlashlarida muhim omil bo‘lishini ta‘kidladi.

Chegara qo‘riqlash vzvodi harbiy xizmatchilariga ma‘muriy bino va 28 xonadonli yangi turar-joyni foydalanishga topshirilishi ham harbiylarga e‘tibor va rag‘batning yana bir namunasi sifatida qayd etildi.

Tadbirga so‘zga chiqqanlar harbiylarning ijtimoiy himoyasi yo‘lidagi bu kabi katta ishlar uchun Prezidentimizga minnadorlik bildirishdi.

Shundan so‘ng harbiy xizmatchilar viloyat rahbarlaridan yangi xizmat uylarining kalitlarini qabul qilib olishdi.

Ma‘muriy bino va xonadonlardagi shart-sharoitlar bilan tanishilib, uy egalari bilan suhbatlashildi. Nuroniy otaxonlar duoga qo‘l ochib, yurtga tinchlik-osoyishtalik, oilalarga qut-baraka tiladilar.