Farg‘ona politexnika institutida “Malakali kadrlar tayyorlash va kasbiy ta‘limga xalqaro ta‘lim dasturlarini joriy etish” mavzusida forum bo‘lib o‘tdi. Mazkur anjuman Germaniyaning “AVESTOS” GmbH kompaniyasi bilan hamkorlikda tashkil etildi.

Unda Farg‘ona, Andijon, Namangan viloyatlaridagi kasbiy ta‘lim tashkilotlari rahbarlari, tuman-shahar hokimliklari mas‘ullari, yirik ish beruvchi korxona va tashkilotlar vakillari ishtirok etishdi.

Forumda viloyat hokimining o‘rinbosari Sherzodjon Polvonov qatnashdi va anjuman qatnashchilari ishiga omad tiladi.

Ta‘kidlash kerakki, Farg‘ona viloyatida kasbiy ta‘lim tashkilotlari va ish beruvchilar bilan hamkorlikda dual ta‘limni tashkil etish yo‘lga qo‘yilib, o‘quvchilar qamrovini yil yakuniga qadar ikki barobarga oshirish rejalashtirilgan. Hozirgacha ikkita texnikumda dual ta‘lim bo‘yicha 111 nafar o‘quvchilar qabul qilindi.

Forum davomida kasbiy ta‘limga xalqaro ta‘lim dasturlarini joriy qilish, ichki va tashqi mehnat bozori talablariga mos raqobatbardosh o‘rta bo‘g‘in kadrlarini tayyorlash, bu jarayonga manfaatdor vazirlik va idoralarni jalb qilish, hamkorlikda dual ta‘limni keng joriy etish, xususan, bu borada “AVESTOS” GmbH kompaniyasi bilan hamkorlikda olib borilayotgan ishlar xususida fikr-mulohazalar aytildi, ma‘ruzalar tinglandi.

Savol-javoblar va qizg‘in bahs-munozaralarga boy o‘tgan forumda ko‘plab takliflar ham aytildi, vodiy viloyatlaridagi kasbiy ta‘lim tashkilotlari rahbarlari tomonidan muhim tashabbuslar ilgari surildi. Yaqin kelajakda shu kabi xorijiy kompaniyalar bilan uzviy aloqalar o‘rnatishga kirishish zarurligi ta‘kidlandi.