Uchko‘prik tumanida O‘zbekiston Respublikasi Prezidenti tomonidan belgilab berilgan yangi tizim asosida tomorqa va ijara yerlaridan samarali foydalanish orqali aholi daromadlarini oshirish chora-tadbirlari mavzusida ko‘rgazmali seminar o‘tkazildi.

Seminarda viloyat hokimining birinchi o‘rinbosari Mirzohid Ubaydullayev, tuman sektorlari rahbarlari, soha mutaxassislari, tajribali tomorqachilar, mahalla fuqarolar yig‘inlari raislari va hokim yordamchilari ishtirok etdi.

Dastlab Hasanqora qishlog‘ida yashovchi Ziyoviddin To‘ychiyev xonadonida tomorqadan samarali foydalanish borasida amalga oshirilayotgan ishlar bilan tanishildi.

Ushbu xonadon sohibi o‘z tomorqasida karam, rediska, pomidor, qalampir, bulg‘or qalampiri, tarvuz kabi 24 xil sabzavot ko‘chatlari yetishtirishni yo‘lga qo‘ygan. Har qarich yerdan unumli foydalangan To‘ychiyevlar oilasi o‘tgan mavsum davomida tomorqadan uch marta hosil ko‘tarib, 150 million so‘m atrofida daromad oldi. Mirishkor oila sohiblari bu yil ushbu daromadni yanada oshirishni ko‘zlab astoydil mehnat qilishmoqda.

Shu qishloqda yashovchi Ahmadali Ermatov tomorqadan foydalanishda o‘ziga xos tajribaga ega sohibkorlardan. U 10 sotix yerda 9 ta kichik issiqxona tashkil etib, qish va bahor oylarida sabzavot ko‘chatlaridan, yozda esa kartoshka va bulg‘or qalampiridan mo‘l hosil yetishtirmoqda.

- Issiqxona usulida pomidor, bodring, qalampir, baqlajon, karam ko‘chatlari yetishtirib, yiliga uch marta hosil olyapmiz. Hozirda bitta issiqxonani o‘zida 25-30 ming dona ko‘chat sotuvga tayyor bo‘lmoqda. Daromad ham shunga yarasha – bir mavsumda sof foydamiz 100-150 million so‘mni tashkil etmoqda, – deydi Ahmadali Ermatov.

Seminarda ta’kidlanganidek, Hasanqora qishlog‘ida tomorqadan foydalanish borasida katta tajriba maktabi yaratilgan. Qishloq aholisining aksariyati ertangi sabzavot ko‘chatlari yetishtirish bilan shug‘ullanadi. Har yili bosqichma-bosqich 20 million donaga yaqin sabzavot ko‘chatlari yetishtirilib, nafaqat atrof tumanlar va viloyatlarga, balki Tojikiston, Qirg‘iziston kabi qo‘shni davlatlarga ham yetkazib berilayotgani hasanqoraliklarning mirishkorligidan dalolat. Bugunga kelib mahallada 350 dan ziyod tomorqa egalari ko‘chatchilik bilan band.

Seminar davomida Hasanqorada tomorqadan samarali foydalanish va ko‘chat yetishtirish borasida yaratilgan tajribani viloyat bo‘ylab keng ommalashtirish yuzasidan zarur tavsiyalar bildirildi.