Вилоят ҳокими Хайрулло Бозоров мутасаддилардан иборат гуруҳ билан вилоятимизга бириктирилган, "Фарғона тажрибаси" асосида ижтимоий-иқтисодий ривожлантирилаётган Қорақалпоғистон Республикасининг Бўзатов туманида бўлиб, бу ерда амалга оширилаётган ишлар билан танишди.

Қорақалпоғистон Республикаси Вазирлар Кенгаши Раиси Фарҳод Эрманов вилоят ҳокимига ҳамроҳлик қилди.

Фарғона вилояти мутасадди ташкилотлари, тадбиркорлик субъектлари ва фермер хўжаликлари томонидан ўтган йилда “йўл харитаси”га асосан мазкур туманда кўплаб ишлар қилинди. 15 гектар майдонда мевали боғ, 15 гектар майдонда узум боғ ташкил этилди. 3875 гектар ер майдони олиниб, 100 гектар ер майдони қайта фойдаланишга киритилди. 10 км ариқ ва зовурлар тозаланди, 15 дона гидротехник иншоотлари таъмирланди, 2 дона насос ўрнатилди ва 2 км электр тармоғи тортилди. 1 та маҳалла биноси, 220 та хонадонларнинг том қисмлари жорий таъмирланди. 21 та микролойиҳалар ишга туширилди.

Айни кунларда қиймати 581 млрд. сўмлик инвестиция лойиҳалари амалга оширилаётган бўлиб, 44 та тадбиркорлик субъектлари ташкил этилади. Бунинг натижасида мингдан зиёд иш ўрни яратилади.

Вилоят раҳбари дастлаб Қусханатов ОФЙда мукаммал таъмирланган 90 ўринга мўлжалланган мактабгача таълим ташкилоти, 5-умумтаълим мактабида қурилган спорт зал билан танишди.

Туманда илғор тажрибалар асосида узум ва бошқа қишлоқ хўжалиги маҳсулотларини етиштириш, иссиқхоналар ташкил этиш бўйича аниқ тадбирлар белгиланган. Вилоят раҳбари мазкур йўналиш бўйича масъулларга вазифаларни белгилаб берди. Шунингдек, наъматак экиш режалаштирилаётган ер майдонларини бориб кўрди.

Бўзатов туманида бугунги кунда ишламай турган текстиль корхонасида бўлиб, вилоятимиз тадбиркорлари томонидан инвестиция лойиҳасини амалга оширишга келишилди. Туман марказида қурилиши режалаштирилган Нуронийлар маскани, оталар чойхонаси, Бўзатов тарихи музейи, маданият маркази учун ажратилган жой билан танишилди. “Яшил макон” лойиҳаси асосида кўчат экиш жараёнида иштирок этилди.

Бўзатов туманида Ўзбекистон Республикаси Вазирлар Маҳкамасининг 2023 йил 2 февралдаги “Қорақалпоғистон Республикасида аҳоли учун муносиб турмуш шароитларини яратиш ва маҳаллалар инфратузилмасини янада яхшилаш чора-тадбирлари тўғрисида”ги қарори ижроси билан танишилди. Томларни шиферлаш, 2 сотихли коттеж ҳамда янгидан қурилиши режалаштирилаётган кўп қаватли уй кўздан кечирилди.

Туман марказидаги собиқ маданият биносида ишлаб чиқариш ва хизмат кўрсатиш йўналишидаги лойиҳаларни жойлаштириш режалаштирилмоқда. Вилоят раҳбари бу бўйича ишларни бошлаш, иш ўринларини кўпайтириш бўйича топшириқлар берди. Шунингдек, аҳоли томорқасидан самарали фойдаланиш, бу борада Фарғонадаги илғор тажрибаларни жорий этиш бўйича вазифалар белгиланди.

Вилоят ҳокими Хайрулло Бозоров вилоятимиздан келган тадбиркорлар билан суҳбатлашиб, амалга оширилаётган ҳар бир лойиҳа Бўзатовнинг иқтисодий ривожи, иш ўрни ва аҳолининг даромадини ошириш учун хизмат қилишлигини таъкидлади. Жорий йилдаги вазифалар муҳокама қилиниб, ҳар бир йўналиш бўйича вазифалар белгилаб берилди.