Toshkent shahrida "INNOPROM. Markaziy Osiyo" V xalqaro sanoat ko‘rgazmasining ikkinchi kun tadbirlari davom etmoqda. Mazkur ko‘rgazma doirasida viloyat hokimi Xayrullo Bozorov Qirg‘iziston Respublikasi Prezidentining Jalolobod viloyatidagi vakolatli vakili Tilek Tekebayev bilan muzokaralar olib bordi. Muloqot chog‘ida ikki davlat rahbarlarining siyosiy irodasi, ko‘plab masalalar bo‘yicha hamfikrligi tufayli O‘zbekiston va Qirg‘iziston o‘rtasidagi ko‘p asrlik do‘stlik va yaxshi qo‘shnichilik rishtalariga asoslangan strategik sheriklik munosabatlari izchil mustahkamlanib borayotgani ta‘kidlandi. Hududlararo hamkorlik aloqalarini yanada rivojlantirish, Farg‘ona viloyati va qo‘shni Jalolobod bilan birgalikda turli sohalarda qo‘shma loyihalarni amalga oshirish yuzasidan fikr almashildi. Sanoat, qishloq va suv xo‘jaligi, turizm va boshqa sohalardagi hamkorlikni kengaytirishga kelishildi. Uchrashuvda Farg‘ona viloyati va Jalolobod viloyati o‘rtasida hamkorlikni har tomonlama kengaytirish maqsadida “yo‘l xaritasi” imzolandi.