Farg‘onada “Yangi O‘zbekiston Olimpiya cho‘qqilari” musobaqalarining mintaqaviy bosqichi boshlandi Farg‘ona shahridagi Olimpiya va Paralimpiya sport turlariga tayyorlash markazida mazkur musobaqalarning engil atletika yo‘nalishi bo‘yicha mintaqaviy bosqichi tashkil etildi. ! Tadbirda so‘z olganlar Prezidentimiz tashabbusi bilan mamlakatimiz bo‘ylab keng ko‘lamda o‘tkazilayotgan mazkur musobaqaning asosiy maqsadi milliy terma jamoa uchun iqtidorli va raqobatbardosh sportchilarni saralab olish, ommaviy sportni keng omma orasida targ‘ib qilish ekanligini ta‘kidladilar. Bellashuvlarda Farg‘ona va Quvasoy shaharlari, Quva, So‘x hamda Farg‘ona tumanlaridan kelgan yosh sportchilar g‘oliblik uchun o‘z mahoratlarini sinovdan o‘tkazishdi. Musobaqa yakunida g‘olib va sovrindorlar medal hamda diplomlar bilan taqdirlanib, viloyat bosqichiga yo‘llanma olishdi. Ma‘lumot uchun: mazkur sport musobaqalari uch bosqichda tashkil etiladi. Dastlabki bosqichlar mintaqalarda o‘tkazilib, unda 15-17 yoshli yoshlar dzyudo, boks, taekvondo WT, og‘ir atletika, yunon-rum va erkin kurash, engil atletika, stol tennisi, badiiy gimnastika hamda 3x3 basketbol kabi olimpiya sport turlarida bellashishadi. Musobaqalar har yili ikki marta, turli hududlarda bo‘lib o‘tishi rejalashtirilgan.