Ushbu ikki tuzilma xalqaro hamjamiyatda o‘rta bo‘g‘inda mehnat bozorida raqobatbardosh mutaxassislar tayyorlash, qayta tayyorlash va malakasini oshirish borasida ulkan salohiyatga ega. Shu bois, dunyoning ko‘plab mamlakatlarida katta hayotiy tajribaga ega va ishonchli hamkor sifatida samarali hamkorlikni yo‘lga qo‘ygan. Uchrashuvda viloyatdagi tekstil sohasida faoliyat olib borayotgan ishchi-xodimlarning malakasini oshirish, ularga zamonaviy texnologiyalar bilan ishlash borasida ko‘nikmalar berish hamda Farg‘ona paxta-to‘qimachilik sanoati mahsulotlarini Germaniya, shu bilan birga Yevropa bozorlariga eksport qilish imkoniyatlari, bu jarayonda ikki tomonlama hamkorlik ko‘lami jadal sur‘atlarda rivojlanib borayotganligi, hamkorlikda olib borilayotgan ishlar holati muhokama qilindi. Viloyat rahbari O‘zbekiston-Germaniya o‘rtasidagi hamkorlik mustahkamlanib borayotganini qayd etib, Farg‘onada boshlangan loyiha yaxshi samara berayotgani, boshqa yo‘nalishlarda ham aloqalarni faollashtirish lozimligini bildirdi. Germaniya trikotaj ishlab chiqaruvchilar konfederasiyasi bosh menejeri Silvia Jangbauer qabul uchun minnatdorlik bildirib, 2022-yil oktyabr oyida viloyatga tashrifi davomida tekstilь sohasida zamonaviy texnologiyalar bilan ishlay oladigan ishchi-mutaxassislarni o‘qitish, qayta tayyorlash bo‘yicha hamkorlikda ishlab chiqilgan loyiha yanada takomillashtirilgani, ushbu loyiha bugun o‘z samarasini berayotganligini ta‘kidladi. O‘zbekiston, xususan, Farg‘ona ishonchli hamkor sifatida Germaniyada ham e‘tirof etilayotganligi, ko‘plab germaniyalik tadbirkorlar yangi loyihalarga investitsiya kiritishga qiziqish bildirayotganligi haqida aytib o‘tdi. Ushbu yo‘nalishlarda yangi hamkorlarni ham Farg‘onaga jalb qilish maqsad qilingani ma‘lum qilindi. Muloqotda viloyat hokimi ayollarni ish bilan ta‘minlashda tekstil sohasi muhim ekanligini qayd etib, bu yo‘nalishdagi yangi loyihalarni ham har tomonlama qo‘llab-quvvatlashga tayyorligini bildirdi. Uchrashuvda germaniyalik tadbirkorlarni viloyatimizga olib kelish, ular bilan hamkorlik bo‘yicha chora-tadbirlarni ishlab chiqishga kelishib olindi.