Respublika ishchi guruhi a‘zolari hududlarda o‘rganishlar olib bormoqda Respublika ishchi guruhi rahbari - Prezident maslahatchisining birinchi o‘rinbosari Po‘lat Bobojonov Farg‘ona tumanida bo‘lib, “mahalla ettiligi” faoliyati, hududlar infratuzilmasi bilan tanishib, aholi muammolarini o‘rgandi. Tadbirkorlar tomonidan amalga oshirilayotgan loyihalarga, yaratilayotgan ish o‘rinlariga e‘tibor qaratdi. Dastlab “Do‘stlik” mahallasida “Fergana agro cluster and logistics” MChJ tomonidan xorijiy investisiyalar hisobiga amalga oshirilayotgan zamonaviy intensiv bog‘ loyihasi bilan tanishildi. Qiymati 2,5 million dollar bo‘lgan ushbu loyiha doirasida turkiyalik investor tomonidan o‘rik, gilos, shaftoli va olxo‘ri kabi eksportbop mevalar etishtirish yo‘lga qo‘yilgan. Tashrif davomida suv nasosini elektr tarmog‘iga ulash bo‘yicha muammo o‘rtaga tashlanib, uni bartaraf etish yuzasidan mutasaddi tashkilotlarga topshiriqlar berildi. Shuningdek, tuman ichki ishlar bo‘limi uchun yangitdan qurilgan ma‘muriy bino ham ko‘zdan kechirildi. Shu kuni “Yangi asr” mahallasidagi “Yangi O‘zbekiston” massivida amalga oshirilayotgan qurilish ishlari ham o‘rganildi. Bunyodkorlik ishlarini amalga oshirayotgan xorijiy investorlar bilan suhbatlashildi. 24-sonli umumta‘lim maktabi faoliyati bilan tanishildi. Mahalla faollari bilan bo‘lib o‘tgan muloqotda Prezidentimiz tashabbusi bilan yaratilgan imkoniyatlardan, o‘zgarishlardan mamnun ekanliklarini bildirdilar.