Bugungi kunda mahalla fuqarolik jamiyatining tayanch ustuni, chinakam xalqchil tuzilmaga aylandi. Prezidentimiz tashabbusi bilan joriy etilgan “mahalla yettiligi” tizimi aholining turmush sifatini oshirish, muammolarni joyida hal etishda muhim o‘rin tutmoqda. Ushbu tizim orqali aholi daromadlarini oshirish, ishsizlikni kamaytirish, tadbirkorlikni rivojlantirish, xotin-qizlar va yoshlar bilan samarali ishlash, jinoyatchilik hamda erta nikohlarning oldini olish kabi dolzarb vazifalar amalga oshirilmoqda. Viloyat hokimi Xayrullo Bozorov rahbarligida o‘tkazilgan yig‘ilishda Mahallalarni qo‘llab-quvvatlash viloyat kengashini joriy yilning birinchi yarim yilligidagi faoliyati tahlil etilib, “mahalla yettiligi” tizimi samaradorligini oshirish, mavjud muammolarni bartaraf etish masalalari muhokama qilindi. Tadbirda huquqni muhofaza qiluvchi organlar, “mahalla yettiligi”ning viloyat boshqarmalari, Mahallalar uyushmasining shahar-tuman bo‘limlari rahbarlari, Kengash a‘zolari hamda boshqa daxldor tashkilot va idoralar vakillari ishtirok etdi. Viloyat rahbari “mahalla yettiligi” oldida turgan ustuvor vazifalarga to‘xtalib, quyi bo‘g‘inda samarali faoliyat yuritish, hamjihatlik, fidoyilik bilan ishlash va natijadorlikka erishish muhimligini ta‘kidladi. Yig‘ilishda mahallalarni ishsizlik, kambag‘allik, oilaviy ajrim va migratsiya kabi muammolardan xoli hududga aylantirish, huquqbuzarlik va jinoyatchilikni bartaraf etish, aholi murojaatlari bilan samarali ishlash borasida amalga oshirilayotgan ishlar yuzasidan mas‘ul rahbarlarning hisobotlari tinglandi. Yig‘ilish yakunida tizim samaradorligini yanada oshirish, muammolarni mahallaning o‘zida hal etish, aholi ehtiyojlarini o‘rganish va manzilli yordamni tashkil etish bo‘yicha aniq chora-tadbirlar belgilab olindi.