Ekinlardan mo‘l hosil etishtirishda kuzgi shudgorning ahamiyati katta. Ota-bobolarimiz “Er haydasang kuz hayda, kuz haydamasang yuz hayda” deb bekorga aytishmagan. Zero, sifatli o‘tkazilgan kuzgi shudgor kelgusi yil hosiliga puxta zamin yaratadi.

Ayni kunlarda hududlarda shudgorlash mavsumiga texnikalarni tayyorlash ishlari yakuniga etkazilmoqda. Viloyatimizda kuzgi shudgorlashda 364 ta yuqori unumli haydov traktorlari ishtirok etadi.

Viloyat hokimi Xayrullo Bozorov viloyat sektorlari rahbarlari bilan birga Yozyovon, Qo‘shtepa hamda Oltiariq tumanlarida bo‘lib, haydov texnikalari sozligi, mexanizatorlar, operatorlar uchun yaratilgan sharoitlar bilan yaqindan tanishdi.

Yozyovon va Qo‘shtepa tumanida qishloq xo‘jaligi texnikalarini mavsumga tayyorlash ishlari yaxshi yo‘lga qo‘yilgan. Otryadlar shakllantirilib, yuqori unumli haydov traktorlari shay holatga keltirildi.

Viloyat rahbari shudgorlash muhim agrotexnik tadbir ekanligini qayd etib, ishlarni sifatli tashkil etish uchun har bir otryadni yuqori unumli haydov texnikalari bilan ta‘minlash, mexanizatorlarga munosib mehnat va dam olish sharoiti yaratish, ularni doimiy rag‘batlantirib borish lozimligini ta‘kidladi.