Viloyatimizda yurtimiz bo‘ylab o‘tkazilayotgan “Ma‘rifat karvoni” ilmiy-ma‘rifiy va madaniy targ‘ibot tadbirlari davom etmoqda.

TATU Farg‘ona filialida “Yangi O‘zbekistonda diniy-ma‘rifiy sohada amalga oshirilayotgan islohotlar va bunyodkorlik ishlari” mavzusida ziyolilar forumi tashkil etildi. Unda poytaxtdan kelgan professorlar-o‘qituvchilar, targ‘ibotchilar ishtirok etdi.

“Ma‘rifat karvoni” tadbirlari doirasida yangi islohotlarning mazmuni, “O‘zbekiston – 2030” strategiyasining ahamiyati va milliy-mafkuraviy g‘oyalar keng targ‘ib qilindi. Tadbirlarda buyuk ajdodlar merosini asrash va ommalashtirish, millatlararo totuvlik va bag‘rikenglik g‘oyalarini rivojlantirish bo‘yicha faol ish olib borildi. Shuningdek, ishtirokchilar uchun O‘zbekistonning milliy-mafkuraviy islohotlarini tushuntiruvchi muloqot platformalari yaratildi.

Viloyat axborot-kutubxona markazida bo‘lib o‘tgan iqtidorli yoshlar, magistrantlar, doktorantlar hamda “El-yurt umidi” jamg‘armasi sovrindorlari bilan uchrashuv yangi tashabbus va g‘oyalarga boy bo‘ldi.

“Ma‘rifat karvoni” tadbirlari aholini, ayniqsa, yoshlarni buzg‘unchi g‘oyalardan himoya qilish, ularning milliy o‘zligini anglashida muhim ahamiyat kasb etmoqda.