Farg‘onada Qishloq xo‘jaligi xodimlari kuni munosabati bilan viloyat bayram tadbiri tashkil etildi. Tadbirga viloyatimiz qishloq xo‘jaligi sohasining ilg‘or vakillari, fermerlar, pillakorlar, mehnat faxriylari taklif etildi.

Viloyat hokimi Xayrullo Bozorov soha xodimlarini kasb bayrami – Qishloq xo‘jaligi xodimlari kuni bilan samimiy tabrikladi.

Mirishkor va mehnatkash dehqonlarimiz xizmati bilan bu yil ham sohada kutilgandan ko‘ra yuqori natijalarga erishilganini alohida e‘tirof etgan viloyat hokimi, Davlatimiz rahbari boshchiliklarida boshqa sohalar qatorida qishloq xo‘jaligida ham katta islohotlar amalga oshirilayotganini, tizimda ilm va amaliyot uyg‘unlashayotgani, natijada yildan yilga hosildorlik oshib borayotganini qayd etdi.

Dehqonlarning yildan yilga manfaati, daromadi ortib borayotganligi, sohaga ilg‘or tajribalar kirib kelayotgani, bozorlardagi to‘kinlik mashaqqatli mehnat samarasi ekanligi ta‘kidlandi.

G‘allachilikda ham yaxshi natijalarga erishilgani, ko‘plab fermer xo‘jaliklarida hosildorlik 100 sentnerdan oshganligi aytib o‘tildi. Ushbu ishlarda tashabbus ko‘rsatgan tumanlarning namunali fermer xo‘jaliklari nomi tilga olindi.

Paxtachilikda 58 ta yangi texnikalardan foydalanilgani o‘z samarasini bergani qayd etilib, kelgusi yil 200 ta paxta terish mashinasi olinishi aytildi. Yangi zamon texnologiyalariga o‘tish kerakligi, dunyo tajribasini qo‘shgan holda qishloq xo‘jaligi yanada rivojlantirish lozimligi bildirildi. Qishloq xo‘jaligi mahsulotlari eksport salohiyati oshayotgani, kelgusi yilda ikki barobar ulkan rejalar qo‘yilgani ta‘kidlandi.

Hosil bayramida qishloq xo‘jaligi sohasida yuqori ko‘rsatkichlarga erishgan bir guruh fermerlarga hamda sohaning ilg‘or faxriylari va xodimlariga “Qishloq xo‘jaligi fidoyisi”, “Ilg‘or fermer”, "Namunali tomorqachi", "Mehnatkash dehqon" ko‘krak nishonlari hamda viloyat hokimining faxriy yorliqlari, esdalik sovg‘alari topshirildi.

Bayram tantanasi taniqli so‘z ustasi Avaz Oxun, elimiz ardog‘idagi xonandalar Yahyobek Mo‘minov, Abdujalil Qo‘qonov, Bahrom Nazarov va Hulkar Abdullayevalar tomonidan ijro etilgan diltortar taronalar bilan davom etdi.