Янги йил байрамини ҳаммадан кўпроқ болажонлар орзиқиб кутишади. Байрам муносабати билан улашиладиган Янги йил совғалари уларга бир олам завқ-шавқ бағишлайди.

Фарғона шаҳридаги Ислом Каримов номидаги вилоят театр-концерт саройида ўтказилган “Президент арчаси” тадбири шукуҳли ва эсда қоларли воқеаларга бой бўлди. Унда шаҳар ва туманлардан оилавий болалар уйи тарбияланувчилари, ота-она қаровисиз қолган ўғил-қизлар ҳамда Ватанимиз тинчлиги ва хавфсизлиги йўлида қурбон бўлган ҳарбий хизматчиларнинг фарзандлари иштирок этди.

Вилоят ҳокимининг ўринбосари Шерзоджон Полвонов болажонларни кириб келаётган 2025 йил билан қутлаб, Президент совғасини топширди.

"Самовий Янги йил" деб номланган театрлаштирилган бадиий дастур намойиши иштирокчиларга янада хушкайфият улашди.

Маълумот ўрнида, вилоятимиздаги оилавий болалар уйи тарбияланувчилари, Ватан сарҳадларини ҳимоялаш йўлида жон фидо қилган ўғлонларимиз ҳамда боқувчисини йўқотган оилаларнинг жами 931 нафар болажонга “Президент совғаси” топширилди.