Вилоят ҳокимининг ўринбосари Нуриддин Мамажонов бошчилигидаги вилоят делегациясининг 2024 йил 13-20 декабрь кунлари Хитой Халқ Республикасига амалий ташрифи давомида эришилган келишувлар ўз самарасини бериб, хитойлик инвесторлар томонидан вилоятимизда янги лойиҳалар бўйича ҳамкорлик кўлами кенгаймоқда. Вилоят ҳокимлигида бўлиб ўтган учрашувда Шандун провинциясидан ташриф буюрган ишбилармон доира вакиллари томонидан Фарғонада трансформатор ишлаб чиқариш, тош қазиб олиш, микро ГЭС қуриш ҳамда шаҳарсозлик йўналишида истиқболли лойиҳаларни амалга ошириш масалалари муҳокама қилинди. Вилоят ҳокимининг ўринбосари Нуриддин Мамажонов инвесторларга яратилган шароитлар ва Фарғонадаги мавжуд саноат зоналаридаги имкониятлар ҳақида маълум қилди. Мулоқот давомида шунингдек, шандунлик тадбиркорларнинг турли ишлаб чиқариш лойиҳаларини йўлга қўйиш учун Шандун технопаркини ташкил этиш, шаҳарсозлик талаблари асосида “Fergana City Mall” лойиҳаси қурилишига инвестиция киритиш бўйича ҳам таклифлар билдирилди. Билдирилган таклифлар асосида аниқ лойиҳалар ишлаб чиқиш ва амалий ишларга киришишга келишилди.