Вилоят ҳокими Хайрулло Бозоров Жанубий Кореянинг Улсан метрополитен шаҳри мэри Ким Ду Гём бошчилигидаги катта делегацияни қабул қилди. Учрашувда Ўзбекистон ва Корея Республикаси ўртасидаги стратегик шериклик алоқалари изчил ривожланиб бораётгани, хусусан, ҳудудлараро муносабатлар янги босқичга кўтарилаётгани алоҳида қайд этилди. Айниқса, Фарғона вилояти ва Улсан шаҳри ўртасидаги алоқалар бугун ўзининг амалий самараларини бераётганлиги айтиб ўтилди. Вилоят ҳокими Фарғона шаҳрида амалга оширилаётган муҳим лойиҳалардан бири – Улсан шаҳри билан ҳамкорликда ташкил этилган мутахассислар тайёрлаш маркази фаолияти ҳақида тўхталиб ўтди. Кемасозлик йўналишида ёшларни ўқитиш дастурининг биринчи босқичи муваффақиятли якунлангани таъкидланди. Илк босқичда 104 нафар ёш мутахассис тайёрланган бўлса, 2025 йил охиригача бу кўрсаткични 200 нафарга, 2026 йилда эса йилига 300 нафарга етказиш режалаштирилган. Мазкур дастурни амалга оширишда яқиндан кўмак бераётгани учун Улсан шаҳри мэрига миннатдорчилик билдирди. Кореялик меҳмон ташриф доирасида куни кеча Фарғона туманида жойлашган Шоҳимардон қишлоғида ҳам бўлиб, ҳудуднинг туризм салоҳияти, табиий гўзалликлари ва диққатга сазовор жойлари билан танишганини ва бу делегация аъзоларида катта таассурот қолдирганини қайд этди. Учрашувда миграция, туризм, таълим, иқтисод, маданият ва бошқа соҳаларда ўзаро манфаатли ҳамкорликни ривожлантириш масалалари муҳокама қилинди. Улсан метрополитен шаҳри мэри Ким Ду Гём Кореяда ўқишни тамомлаган ўзбекистонлик талабалар учун виза масаласини ҳал этиш, уларни ишга жойлаштириш бўйича тизимни ўзгартириш борасида олиб борилаётган ишлар ҳақида маълумот берди. Тошкентда ўтказилган учрашувларда эришилган лойиҳалар асосида киритилаётган инвестицияларни Фарғонага йўналтириш муҳим эканлигини қайд этди. Фарғона ва Улсан ўртасида дўстона алоқаларни ўрнатиш вақти келганлиги айтиб ўтилди. Самимий руҳда ўтган мулоқотда билдирилган янги таклифлар асосида ҳамкорлик йўналишларини янада кенгайтириш ва режалаштирилган ишлар ижросини жадаллаштириш бўйича масъуллар бириктирилиб, аниқ чора-тадбирлар келишиб олинди.