Фарғона давлат техника университетида меҳнат ярмаркаси ва “Бизнес марафон” тренинг машғулотлари бўлиб ўтди Фарғона давлат техника университетида “Долзарб 90 кун” лойиҳаси доирасида меҳнат ярмаркаси ҳамда “Бизнес марафон” семинар-тренинг машғулотлари ташкил этилди. Тадбир Фарғона вилояти ҳокимлиги, вилоят прокуратураси, Ёшлар ишлари агентлиги, Олий таълим, фан ва инновациялар бошқармаси ҳамда бир қатор тегишли ташкилотлар ҳамкорлигида ўтказилди. “Муваффақиятли бандлик — сифатли таълимнинг ишончли кафолати!” шиори остида ташкил этилган меҳнат ярмаркасининг асосий мақсади олий таълим муассасалари битирувчиларини иш билан таъминлаш, уларни касб-ҳунарга йўналтириш ҳамда тадбиркорлик фаолиятига кенг жалб этишдан иборат бўлди. Ярмаркада вилоятдаги 30 тадан ортиқ йирик корхона ва ташкилотлар иштирок этиб, 1 минг 200 дан зиёд бўш иш ўринлари таклиф этилди. Унда 2 минг 100 нафардан ортиқ битирувчи талабалар қатнашди. 1 минг 500 нафарга яқин талабалар билан суҳбатлар ўтказилди. Натижада 450 нафар талаба билан ишга жойлашиш бўйича келишувларга эришилди. 860 нафардан ортиқ талабалар эса қўшимча суҳбатлар учун йўлланма олишди. Тадбирнинг иккинчи қисмида вилоятда муваффақиятли фаолият юритаётган 25 нафардан зиёд тадбиркор ҳамда тижорат банки ходимлари иштирокида “Бизнес марафон” семинар-тренинг машғулотлари ўтказилди. Ушбу машғулотлар ёшлар ўртасида тадбиркорлик ғояларини шакллантириш ва амалий кўникмаларни ривожлантиришга қаратилди.