Жанубий Кореянинг таълим ва тиббиёт соҳалари учун зарур жиҳозлар ва замонавий қурилмалар ишлаб чиқариш бўйича дунёдаги нуфузли компанияларидан бири бўлган “AHA Co., Ltd” компанияси раҳбари Ку Ги До бугун вилоят ҳокими Хайрулло Бозоров қабулида бўлди. Учрашувда Фарғона шаҳрида қурилиши режалаштирилаётган электрон доскалар ва электр транспорт воситаларини зарядловчи станциялар ишлаб чиқариш пилот лойиҳаси яна бир бор муҳокама қилинди. Келишувларнинг амалий босқичи бўлган, лойиҳа қиймати 20 млн долларни ташкил этаётган корхонада ички истеъмол ва экспорт учун электрон доскалар (IFPD), EV зарядловчи станциялари, соғлиқни сақлаш тармоғи учун жиҳозлар ва бошқа маҳсулотларни маҳаллий тарзда ишлаб чиқариш ҳамда экспорт қилиш мақсад қилинган. Мулоқот давомида вилоят ҳокими инвесторлар томонидан илгари сурилган лойиҳани янада ривожлантириш бўйича таклифларни тинглади. Вилоят ҳокимлиги доимо бундай ўзаро манфаатли инвестицион лойиҳаларни қўллаб-қувватлашга тайёр эканлиги таъкидланди ҳамда лойиҳа доирасидаги қурилиш ишларини тезлаштириш зарурлигига эътибор қаратди. Учрашув якунида мазкур лойиҳани муваффақиятли амалга ошириш ва ҳамкорликдаги ишлар юзасидан фаол ҳаракатларни жадаллаштириш юзасидан чора-тадбирлар белгиланди. Маълумот ўрнида, “AHA Co., Ltd” компанияси 1995 йилда ташкил топган бўлиб, таълим технологиялари (EdTech), соғлиқни сақлаш ва электр транспорт воситаларини (EV) зарядлаш қурилмаларини ишлаб чиқаришга ихтисослашган. Компаниянинг Япония, Германия, Қозоғистон ва АҚШда халқаро филиаллари ташкил этилган.