Bugun barcha sohalarda bo‘lgani kabi qishloq xo‘jaligiga ham innovasiyalarni tatbiq etish, ilg‘or texnologiyalardan foydalanish muhim ahamiyat kasb etadi. Yozyovon tumanidagi “Mezon” fermer xo‘jaligi paxta etishtirishda katta tajriba maktabini yaratgan. Xususan, o‘tgan yili paxtadan 60-65 sentnerdan hosil, 1,5 mlrd. so‘m daromad olingan. Bu yil 90 gektar maydonda parvarishlanayotgan g‘o‘zalar rivoji ham ko‘zni quvnatadi. – Joriy yil 15 mart kuni plyonka ostiga chigit ekishni boshlaganmiz. Xitoydan keltirilgan “Xin Lu Zao-78” navli paxtani qo‘shqator usulida ekib, tomchilatib sug‘orish orqali parvarishladik, – deydi fermer xo‘jaligi rahbari Vohidjon Obidov. – Bu usulda parvarishlashning ko‘plab ijobiy tomonlari bor: birinchidan, har gektar maydonga 240-250 ming tup ko‘chat sig‘adi, ikkinchidan, sug‘orishda sezilarli darajada suvni tejash mumkin, uchinchidan, yagana, chekanka qilinmaydi, hosilni ham tez fursatda, bir terimda yig‘ishtirib olinadi. Uning aytishicha, qo‘shqator usulda ekib parvarishlangan paxtani yig‘ishtirib olish uchun viloyatimizga keltirilayotgan terim mashinalarining afzalliklari ko‘p. Jumladan, paxtani qo‘lda terib olish uchun ilgari 45-50 kun vaqt sarflagan. Zamonaviy paxta terish mashinalarida esa bunga uzog‘i bilan o‘n kun vaqt ketadi. Shuningdek, hosil sifatli, toza teriladi.