Uchko‘prik tumanida “O‘zbek-qirg‘iz chegara oldi hududlari biznes forumi” bo‘lib o‘tdi

Viloyatimizga xorijiy investitsiyalarni keng jalb qilish, eksport hajmlarini oshirish, yangi tovar nomenklaturalarini eksportga yo‘naltirish, halqaro hamkorlik aloqalarini kengaytirish, mahalliy va xorijiy tadbirkorlik subyektlari o‘rtasida to‘g‘ridan-to‘g‘ri aloqalarni yo‘lga qo‘yish kabi muhim masalalar yuzasidan aniq choralar ishlab chiqilmoqda.

Prezidentimizning tadbirkorlar bilan ochiq muloqotida berilgan topshiriqlari ijrosi doirasida Uchko‘prik tumanida “O‘zbek-qirg‘iz chegara oldi hududlari biznes forumi” o‘tkazildi. Ikki kun davom etgan biznes forum jarayonida qirg‘izistonlik mehmonlar “Qo‘qon” erkin iqtisodiy zonasida ishlab chiqarish va eksport bilan shug‘ullanuvchi korxonalar, “Mehrigiyo” korxonasi va “Boboshbek” savdo kompleksining faoliyati bilan yaqindan tanishdilar. Farg‘ona viloyati va Qirg‘iziston korxonalarining mahsulotlari ko‘zgazmasi ko‘zdan kechirildi.

Biznes forumni viloyat hokimining o‘rinbosari Nuriddin Mamajonov ochib berdi. Qirg‘iziston Respublikasining Jalolobod, O‘sh va Botken viloyatlaridan ishtirok etgan vakillar ham mazkur biznes forumning ikki hudud savdo aloqalarini mustahkamlashdagi o‘rni xususida to‘xtaldilar.

Ikki tomonning investitsiyaviy salohiyati haqida taqdimotlar o‘tkazildi. Farg‘ona va Qirg‘iziston korxonalari ishtirokida B2B muloqotlar o‘tkazilib, savdo va investitsiyaviy kelishuvlarga erishildi.