Фарғона вилояти ва Душанбе шаҳри ўртасида архитектура ва шаҳарсозлик бўйича ҳамкорлик алоқалари янада кенгаяди.

Фарғона вилояти қурилиш ва уй-жой коммунал хўжалиги бош бошқармаси раҳбарияти, туман ва шаҳар бош архитекторлари ҳамда етакчи лойиҳа ташкилотлари вакилларидан иборат делегация Тожикистон Республикасининг Душанбе шаҳрида бўлиб, архитектура ва шаҳарсозлик йўналишида икки томонлама манфаатли ҳамкорлик масалаларида учрашувлар ўтказилди.

Мазкур ташрифнинг мақсади замонавий архитектура талаблари асосида қурилиш соҳасини ривожлантириш бўйича инновацион лойиҳалар, ландшафт, дизайн, мастер-режалар, бино ва иншоотларни лойиҳалаш борасида ўзаро тажриба алмашиш ва Душанбе шаҳридаги ижтимоий ва инфратузилма объектлари билан танишишдан иборат бўлди.

Душанбе шаҳар давлат ҳокимияти ижроия органи биносида шаҳар раисининг биринчи ўринбосари Табарзода Жамшед, Душанбе шаҳар бош архитектори Соли Азизон билан учрашув бўлиб ўтди.

Учрашувда икки қўшни мамлакатлар ўртасида ўзаро чамбарчас боғлиқ ҳамкорлик ришталари, архитектура, шаҳарсозлик ва Душанбе шаҳрида шаҳарсозлик тажрибасини ўрганиш ва делегациялар алмашинуви имкониятларини ўрганиш бўйича ҳамкорлик масалалари муҳокама қилинди.

Шунингдек, вилоят делегацияси мазкур шаҳардаги архитектура ва шаҳарсозлик бўйича олиб борилаётган ишлар билан танишдилар.