O‘zbekiston xalq shoiri (1987), O‘zbekiston Qahramoni (1999), dramaturg va jamoat arbobi Vohidov Erkin Vohidovich 1936-yil 28 dekabr kuni Oltiariq tumanida tug‘ilgan. Toshkent davlat universitetining filologiya fakultetini tugatgan (1960). “Yosh gvardiya” nashriyotida muharrir, bosh muharrir (1960-63; 1975-82), G‘afur G‘ulom nomidagi Adabiyot va san‘at nashriyotida muharrir, bosh muharrir (1963-70), direktor (1985-87), “Yoshlik” jurnali bosh muharriri (1982-85) bo‘lib ishlagan.

Ilk she‘riy to‘plami — “Tong nafasi” 1961-yilda nashr etilgan. Erkin Vohidov “Tong nafasi”, “Qo‘shig‘im sizga”, “Aql va yurak”, “Mening yulduzim”, “Yoshlik devoni”, “Tirik sayyoralar”, “Sharqiy qirg‘oq”, “Kelajakka maktub” kabi she‘riy to‘plamlari, “Nido”, “Quyosh maskani”, “Ruhlar isyoni”, “Ko‘hinur” kabi dostonlari, “Oltin devor”, “Istanbul fojiasi” singari sahna asarlari, “So‘z latofati” badiiy risolasi, jahon adabiyotining mumtoz namoyandalari merosidan qilgan tarjimalari bilan o‘ziga xos ijodiy maktab yaratgan shoirlardan biridir.

Erkin Vohidov O‘zbekiston Oliy Kengashi deputati (Oshkoralik masalalari qo‘mitasi raisi, 1990-95), 1995-yildan O‘zbekiston Oliy Majlisi deputati va Xalqaro ishlar va parlamentlararo aloqalar qo‘mitasi raisi bo‘lgan.

Erkin Vohidov “Buyuk xizmatlari uchun” ordeni bilan mukofotlangan (1997). Hamza nomidagi O‘zbekiston Davlat mukofoti laureati (1983) edi.

O‘zbekiston Qahramoni, Xalq shoiri Erkin Vohidovning sakkiz kitobdan tarkib topgan “To‘la asarlar to‘plami”ning dastlabki to‘rt kitobi umrning to‘rt faslini ifoda etuvchi ijod namunalaridan iborat bo‘lib, “Bahor tarovati”, “Yoz harorati”, “Kuz saxovati”, “Qish halovati” deb nomlandi. Ushbu 4 ta jild shoir hayotligida chop etilgan edi. Shuningdek, 2016-yil shoir haqida “Erkin Vohidov zamondoshlari nigohida” to‘plami ham nashr etilgan edi.

O‘zbek adabiyoti va madaniyati rivojiga unutilmas hissa qo‘shgan atoqli shoir va adib, taniqli davlat va jamoat arbobi, O‘zbekiston Qahramoni Erkin Vohidov 2016-yilda vafot etgan.

Prezidentimizning 2016-yil 7-dekabrdagi “O‘zbekiston xalq shoiri Erkin Vohidov tavalludining 80 yilligini nishonlash to‘g‘risida”gi qarori asosida Marg‘ilon shahrida ijodkorlar bog‘i tashkil etilib, Erkin Vohidovning haykali o‘rnatildi va memorial muzeyi bunyod etildi.

O‘zbekiston Respublikasi Vazirlar Mahkamasining 2018-yil 14-maydagi qarori bilan Marg‘ilon shahrida Erkin Vohidov nomidagi ona tili va adabiyoti fanini chuqur o‘qitishga hamda xorijiy tillarga ixtisoslashtirilgan maktab-internat tashkil etildi.