Turk ishbilarmon doira vakillaridan iborat delegatsiya ayni paytda Farg‘ona viloyatida bo‘lib, turli sohalarda istiqbolli loyihalarni amalga oshirish borasida uchrashuvlar o‘tkazilmoqda.

Mazkur delegatsiyani viloyat hokimining o‘rinbosari Nuriddin Mamajonov qabul qildi. Unda ikki tomonlama manfaatli hamkorlik istiqbollari muhokama qilindi.

Uchrashuvda O‘zbekiston-Turkiya munosabatlari yangi bosqichda davom etayotganligi, buning samarasida hududlararo aloqalar faollashayotgani ta‘kidlandi. Xususan, viloyatimizda turk investorlari bilan hamkorlikda bugungi kunda 65 ta korxona faoliyat olib borayotgani qayd etilib, turli sohalarda loyihalarni birgalikda amalga oshirishga tayyorligi bildirildi.
Delegatsiya a‘zolari tomonidan viloyatimizda sog‘liqni saqlash yo‘nalishida bir qator loyihalarni amalga oshirish imkoniyatlari haqida so‘z yuritildi.

Mehmonlar viloyat sog‘liqni saqlash boshqarmasi, Farg‘ona shahridagi “Meredian Diagnostic” xususiy tibbiyot diagnostika markazi, “Compass” klinikasi, “Central Asian Medical University” tibbiyot universitetida bo‘lib, u yerdagi sharoitlar bilan tanishadilar.