Farg‘ona viloyatining anklav hududida joylashgan Shohimardon qishlog‘i yilning to‘rt faslida ham betakror va xushmanzara tabiati bilan sayyohlarni ohanrabodek o‘ziga chorlaydi. Ayni kunlarda esa Shohimardonda qish tarovati hukmron. Viqorli qoya-toshlar saltanati, oq libosga burkangan bepoyon archazorlar, zarif qo‘shiqlar kuylab oqadigan tiniq soylar, sharqona hovlilardagi maroqli suhbatlar har qanday qishida bir umrga unutilmas xotiralar qoldiradi.