Farg‘ona shahrining Ekoshahar - “Yangi O‘zbekiston” massivida viloyat bojxona boshqarmasi xodimlari uchun bunyod etilgan 9 qavatli 70 ta xonadondan iborat xizmat uylari foydalanishga topshirildi. Bu uylar 26 yanvar – O‘zbekiston Respublikasi Davlat bojxona xizmati organlari xodimlari kuniga munosib tuhfa bo‘ldi.

Tantanali marosimda viloyat sektorlari rahbarlari, viloyat bojxona boshqarmasi mas‘ullari, bojxonachilar va soha faxriylari ishtirok etdi.

Viloyat hokimi Xayrullo Bozorov bojxona organlari mamlakat iqtisodiy xavfsizligi va manfaatlarini ta‘minlashda asosiy tayanch va himoyachilardan biri ekanligini qayd etib, kasb bayrami bilan tabrikladi. Mazkur tizimda xizmat qilayotgan xodimlarning ijtimoiy himoyasiga, uy-joy bilan ta‘minlashga muhim e‘tibor qaratilayotganligi ta‘kidlanib, Prezidentimiz farmoni asosida qurilgan ekoshahardagi mazkur zamonaviy xizmat uylari ham buning yaqqol samarasi ekanligi aytib o‘tildi. Yangi uyga ega bo‘lgan bojxona xodimlariga samimiy tilaklar bildirildi.

Mazkur turar joy majmuasi "Osiyo qurilish ta‘mir" MChJ tomonidan bunyod etildi. Shinam uylarda barcha sharoitlar yaratilgan.

Bojxonachilar ham o‘z navbatida sohaga ko‘rsatilayotgan e‘tibor va yaratilayotgan shart-sharoitlar uchun o‘z minnatdorligini bildirdi.

Tadbirda yangi uylar kalitlari tantanali tarzda topshirildi.

Ramziy lentalar qirqilib, xonadonlarda yaratilgan shart-sharoitlar ko‘zdan kechirildi. Nuroniylar duoga qo‘l ochib, yurtimizda mana shunday bunyodkorlik, ma‘murchilik, farovonlik barqaror bo‘lishini tilashdi.