Mamlakatimizdagi ochiqlik siyosati, so‘z va matbuot erkinligini ta’minlash yo‘lidagi sa’y-harakatlar bugun e’tirofga loyiq. Yangi O‘zbekiston taraqqiyoti yo‘lida amalga oshirilayotgan hayotbaxsh islohotlarda mamlakatimizning nufuzli nashri sifatida gazetxonlar qalbidan joy olgan “Yangi O‘zbekiston” gazetasining alohida o‘rni bor.

Gazeta sahifalarida o‘rin olgan maqola va xabarlar rang-barangligi, jamiyatimizning barcha qatlamlariga qaratilgan, umuminsoniy prinsiplariga asoslangan erkin muloqot maydoni sifatida shakllanganligini tez ilg‘aysiz. Bu muloqotlar gazeta mazmun-mundarijasi, mavzular doirasini kengaytirish imkoniyatini berayotgani bilan ahamiyatli. Yurtimiz shiddat bilan yangi taraqqiyot sari intilmoqda. Islohotlar aqlni shoshirib yuboray deydi. Mana shunday pallada, masalaga to‘g‘ri yondashuv, tahlil, holis tanqid zarur. Bu ehtiyojni, shubhasiz, gazeta qondira oladi. Shuning uchun ham bu gazeta qisqa vaqt ichida o‘z o‘quvchilariga ega bo‘la oldi. Farg‘ona viloyatida gazetaning ko‘plab muxlislari bor.

Gazeta sayti hisoblangan yuz.uz jonlanib, tahliliy va tezkor axborotlar bilan mushtariylarni xursand qilmoqda.
Gazeta endigina besh yillik sharafli yo‘lni bosib o‘tdi. Ammo u dolzarb mavzular, esda qolarli voqea va hodisalarni xolisona o‘zida aks ettirayotgani bilan ajralib turadi.

Viloyat hokimligi gazeta jamoasini qutlug‘ sana bilan tabriklab, ijodiy yutuqlar, omad va muvaffaqiyatlar tilaydi.