Quvasoy shahridagi “Bog‘bon” MFY hududida istiqomat qiluvchi Ro‘ziboy Mamajonov tomorqadan unumli foydalanib kelayotgan hamyurtlarimizdan biri. Uning mahalladoshlarini o‘z ortidan ergashtirayotgani ham alohida e‘tirofga loyiqdir. – Yaqin-yaqingacha men ham tomorqadan mo‘may daromad olishga ishonmasdim, - deydi Ro‘ziboy Mamajonov. – Ijtimoiy tarmoqlarda tajribali tomorqachilarning faoliyatini kuzatib borib, fikrim o‘zgardi. Uyimizga yaqin fermer xo‘jaligidan ozgina joyni ijaraga olib, qulupnaychilikni yo‘lga qo‘ydim. Dastlabki yildayoq kutganimdan ancha ko‘p daromad oldim. Shu-shu tomorqachi bo‘ldim-qoldim. Shunga ham besh yil bo‘libdi! Ro‘ziboy Mamajonovning faoliyati bilan yaqindan tanishib, amin bo‘ldikki, u bu darajaga osonlikcha erishmagan. Qulupnay etishtirish ilmini obdon o‘rgangan. Bu borada samarador bo‘lgan Evropa tajribasini o‘z faoliyatida qo‘llagan. – Faoliyatimni kengaytirish uchun o‘tgan 2024 yilda 3 sotixli issiqxona qurdim, - deya davom etadi tajribali tomorqachi. – Issiqxona qurish uchun 100 million so‘mga yaqin xarajat qildim. Hozirgi kunda yangi issiqxonada 50 ming tupga yaqin qulupnay ko‘chati parvarishlayapman. Nasib qilsa, aprelь oyida ularni xaridorlarga etkazib beraman. Dastlabki hisob-kitobimga ko‘ra, birinchi hosildayoq issiqxona xarajati ortig‘i bilan qoplanar ekan. Bu yil ham yana bitta issiqxona barpo etishni rejalashtirib turibman. Maqsadim – kelgusida mahallamizda qulupnaychilik sohasida korporasiya tashkil etib, ko‘plab yoshlarni ish bilan ta‘minlash. Bu borada MFY faollari bilan hamkorlikda ish olib boryapmiz.