Shu kunlarda buyuk mutafakkir, atoqli davlat va jamoat arbobi, she‘riyat mulkining sultoni Mir Alisher Navoiy tavalludining 584 yilligiga bag‘ishlangan bayram tadbirlari butun respublikamizda, shu jumladan, viloyatimizda ham ko‘tarinkilik bilan nishonlanmoqda.

Bugun erta tongdan Farg‘ona shahridagi Alisher Navoiy xiyobonida davlat va jamoat tashkilotlari rahbarlari, adabiyotshunos olimlar, ziyolilar, talaba-yoshlar va she‘riyat ixlosmandlari jam bo‘ldilar.

Navoiyga ehtirom tadbirida viloyat hokimining o‘rinbosari Sherzodjon Polvonov so‘z olib, yig‘ilganlarni hazrat Navoiy tavalludi bayrami bilan qutladi. Bobokalonimizning ijtimoiy-siyosiy hayotiga, uning asarlaridagi ma‘naviy-tarbiyaviy jihatlarga alohida to‘xtalib o‘tdi.

Tadbirda so‘z olganlar ulug‘ ajdodimizning boy ilmiy merosi, yozgan bebaho asarlari, g‘azal va ruboiylari, “Xamsa” dostoni, shuningdek, davlat ishlaridagi fidoyiligi xususida so‘z yuritdilar.

Tadbir davomida Erkin Vohidov nomidagi ijod maktabi o‘quvchilari tomonidan Alisher Navoiy g‘azallari va ruboiylaridan namunalar o‘qildi, turli sahna ko‘rinishlari, kuy-qo‘shiqlar ijro etildi.

Ehtirom tadbiri so‘ngida yig‘ilganlar Alisher Navoiy haykali poyiga gul qo‘yib, hurmat bajo keltirdilar.