Yosh, bilimli hamda salohiyatli kadrlar mamlakatimiz taraqqiyotida muhim o‘rin egallaydi. Farg‘onalik yoshlar orasida bunday iqtidorlilar ko‘plab topiladi.

Viloyat hokimi Xayrullo Bozorov viloyatimizdagi oliy o‘quv yurtlari, tizim va boshqarmalarda faoliyat olib borayotgan bir guruh yosh mutaxassislar bilan uchrashdi.

Viloyat rahbari Yangi O‘zbekistonda amalga oshirilayotgan islohotlar jarayonida tashabbuskor, mas’uliyatni o‘z zimmasiga olishga qodir, yuksak natijaga erishish yo‘lida barcha kuch-g‘ayratini safarbar eta oladigan bilimli, professional va vatanparvar yosh kadrlarga ehtiyoj ortayotganligini bildirdi. Bugungi kunda xorijiy tilni bilish, o‘z ustida tinmay izlanish muhimligini qayd etib, viloyatimizda investitsiya, iqtisodiyot, ijtimoiy va boshqa sohalar uchun salohiyatli mutaxassislar kerakligini, buning uchun viloyatda kadrlar yetishtiradigan tizim yaratish zarurligini aytib o‘tdi.

- Viloyatimizni ijtimoiy-iqtisodiy rivojlantirish maqsadida joriy yilda ulkan marralar belgilangan, - dedi viloyat hokimi. – Albatta, bu ishlarda siz kabi fidoyi, tashabbuskor mutaxassislar juda zarur. Kasbga sadoqatli bo‘lib, sidqidildan mehnat qilish, bu Vatanga xizmat qilishning asl namunasidir.

Samimiy muloqot davomida yosh mutaxassislarning reja va maqsadlari, takliflari tinglandi.