Farg‘onada ilk marotaba she‘riy konsert bo‘lib o‘tdi

Ahmad Farg‘oniy nomidagi viloyat axborot - kutubxona markazida Yoshlar ishlari agentligi viloyat boshqarmasi bilan hamkorlikda shoir va tarjimon Aziz Said ishtirokida “Dili qani Bedilning?.. ” nomli she‘riy konsert tashkil etildi.

Aziz Said 1961 yilda Tojikistonning Dushanbe shahrida tug‘ilgan. “Chiltor” (1988), “Dili qani Bedilning” (1996), “G‘oyibdan do‘st bilan suhbatlar” (2001), “Fursat darvozasi” (2007) nomli va boshqa she‘riy kitoblar muallifi. Nozim Hikmatning “Yusuf va Zulayho”, Paulo Koeloning “Alkimyogar” kabi turli chet el ijodkorlarining nodir asarlarini o‘zbek tiliga tarjima qilgan.

Lirika kechasida Aziz Said bilan farg‘onalik muxlislarning so‘z san‘ati, ijod olami bilan bog‘liq qiziqarli savol-javoblari bo‘lib o‘tdi. Sahnalashtirilgan she‘riy asarlar o‘qildi. Yig‘ilganlar shoir ijodiy namunalarini maroq bilan eshitdilar.

Bu kabi she‘riy kechalarni tashkilotchilar tomonidan elimiz suygan ijodkorlar ishtirokida muntazam davom ettirib borishga kelishib olindi.