2025-yil 11-fevral kuni Farg‘ona tumani Maktabgacha va maktab ta‘limi bo‘limi tasarrufidagi 24-umumiy o‘rta ta‘lim maktabida "Al-Xorazmiy nomidagi aniq va tabiiy fanlar olimpiadasi" tantanali ravishda boshlandi. Tadbirni Farg‘ona tumani Maktabgacha va maktab ta‘limi bo‘limi boshlig‘i Shavkatjon Yuldashev ochib, barcha ishtirokchilarga omad tiladi va ularning bilimlarini yuksak saviyada namoyon etishlarini tilab qoldi. Olimpiada jarayonlari yuqori shaffoflik va adolat tamoyillariga asoslangan holda tashkil etildi. O‘quvchilar bilimlarini sinovdan o‘tkazish uchun guruhlarga ajratilib, har bir sinfxonada kuzatuv kameralari o‘rnatildi. Bu esa ota-onalarga ijtimoiy tarmoqlar orqali to‘g‘ridan-to‘g‘ri kuzatish imkoniyatini yaratdi. Test sinovi materiallari maxsus qadoqlangan holda, viloyat Maktabgacha va maktab ta‘limi bo‘limi vakili tomonidan etkazib berildi. Ishtirokchilarga test topshiriqlari va javoblar varaqalari o‘z vaqtida tarqatilib, jarayon Nizom talablari asosida o‘z vaqtida boshlandi.