Yozyovon tumani hududida joylashgan Markaziy Farg‘ona suv ombori atrofida “Yashil makon” umummilliy loyihasi doirasida 200 gektardan ortiq maydonda “yashil belbog‘” tashkil etish ishlari boshlandi. Bugun viloyat hokimligi, tashkilot va boshqarmalar rahbarlari, jamoatchilik vakillari, yoshlar, nuroniylar ishtirokida bo‘lib o‘tgan tadbirda mazkur loyihaga start berildi.

Viloyat hokimi Xayrullo Bozorov yig‘ilganlarni bahor va nafosat bayrami bilan tabriklab, Markaziy Farg‘ona cho‘lida yirik loyihaga kirishilayotganligini, xususan, Yozyovon tumani taraqqiyotida yangi davr boshlanayotganligini ta‘kidlab o‘tdi. Suv ombori atrofidagi bo‘sh turgan 300 gektar yerlar o‘zlashtirilib, yashil hududlar tashkil etilayotgani Prezidentimiz tashabbusi bilan boshlangan “Yashil makon” loyihasining amaliy samaralaridan biri ekanligini qayd etdi.

- Vodiyning markazi bo‘lgan Yozyovonda turizmning ko‘plab turlarini rivojlantirish uchun katta salohiyat bor, - dedi viloyat rahbari. - Qisqa fursatlarda bu yerda yashillik bilan birga zamonaviy dam olish maskanlari, xizmat ko‘rsatish obyektlari barpo etiladi. Xususan, bu maskan cho‘l turizmi sifatida eng yirik va go‘zal majmua bo‘ladi. Ayni kunlarda bu bo‘yicha loyiha ishlari olib borilmoqda. E‘tiborli jihati, turizm tuman iqtisodiyotining drayveri bo‘lib, minglab ish o‘rinlari yaratiladi. Hozirdan ko‘plab tadbirkorlarimizdan yaxshi takliflar bildirilmoqda.

Nuroniylar Ahmadjon Ismoilov, Muxtorjon Sarimsaqov Markaziy Farg‘ona cho‘llarining tarixi va buguni haqida to‘lqinlanib gapirishib, xayrli ish boshida turganlarga minnatdorchilik bildirishdi.

Xatmi qur‘on o‘qilib, jonliq so‘yildi. Yurtga tinchlik, dehqonchiliklarga baraka tilanib, duolar qilindi.

Tadbirdan so‘ng minglab hasharchilar ishtirokida ko‘chat ekish ishlariga kirishdilar. “Yashil belbog‘”ga qarag‘ay, oq qayin, kaliforniya teraklari, pavloniya ko‘chatlari ekilmoqda. Loyiha doirasida suv ombor atrofiga bir million tupga yaqin ko‘chat ekish rejalashtirilgan.