Viloyatimizda amaliy tashrif bilan bo‘lib turgan Janubiy Koreyaning Ulsan metropoliten shahri meri Kim Du Gyom boshchiligidagi delegatsiya Farg‘ona davlat texnika universitetida bo‘lib, Navro‘z bayrami tantanalarida ishtirok etdi. Viloyat hokimi Xayrullo Bozorov mehmonlarga hamrohlik qildi. Bahor va yangilanish ayyomida namoyish etilgan xalqimizning qadriyatlari, urf-odatlari, kuy va qo‘shiqlar mehmonlarda katta taassurot qoldirdi. Ayniqsa, universitet talabalari tomonidan tayyorlangan bahoriy taomlar, milliy hunarmandchilik namunalari, doshqozondagi sumalak va turli chiqishlar o‘zgacha shukuh bag‘ishladi. Mehmonlar pavilonlardagi mazkur ko‘rgazmalar bilan tanishdilar, Navro‘z saylini yuqori baholashdi.