Navro‘z bayramida viloyatimizda ko‘plab yangi korxonalar, ijtimoiy soha ob’yektlari, loyihalar foydalanishga topshirilmoqda.

Bugun “Qo‘qon” erkin iqtisodiy zonasida “Hong Gang International” qo‘shma korxonasining elektroskuterlar uchun akkumulyatorlar ishlab chiqarish loyihasi ishga tushirildi.

Mazkur korxonaning ochilish marosimi katta tantanaga aylandi, unda investorlar, Uchko‘prik tumani hokimligi mas’ullari, faollar hamda nuroniylar ishtirok etdi.

Viloyat hokimi Xayrullo Bozorov ishtirokchilarni Navro‘z bilan tabriklab, mazkur korxonaning ishga tushirilishi bayramga munosib tuhfa bo‘lganligini bildirdi. Viloyatimizdagi qulay investisiyaviy muhit bugun o‘z samarasini berayotganligi, xususan, “Qo‘qon” EIZda ham hamkorlikda yirik loyihalar amalga oshirilayotganligini qayd etib, bu o‘z navbatida aholining bandligini ta’minlash, sifatli va raqobatbardosh mahsulotlar ishlab chiqarishga xizmat qilayotganligi ta’kidlandi.

Korxona ta’sischilari ham so‘z olib, Prezidentimizga yaratib berilayotgan imkoniyat va sharoitlar uchun minnatdorchilik bildirdi. Yana bir loyihani amalga oshirishga kirishilganligi ma’lum qilindi.

Xitoylik ishbilarmonlar bilan hamkorlikda tashkil etilgan loyiha uchun to‘g‘ridan-to‘g‘ri 11 mln dollar investisiya yo‘naltirildi hamda zamonaviy dastgohlar o‘rnatildi. 300 ta yangi ish o‘rinlari yaratildi. Birinchi bosqichdagi loyiha doirasida bu yerda yiliga 250 ming dona qo‘rg‘oshinli akkumulyatorlar ishlab chiqariladi. Xitoylik investorlar bu yerda 60 mln dollarlik yana bir loyihani boshlamoqdalar.

Ramziy lenta qirqilib, ishtirokchilar korxona faoliyati bilan tanishdilar.