Taniqli ijodkorlar, olim va tarjimonlardan iborat poytaxtlik mehmonlar bilan uchrashuv hamda O‘zbekiston Yozuvchilar uyushmasi safiga yangi a‘zolarning qo‘shilishi mintaqaviy bosqichning tantanali ochilish marosimiga ko‘tarinkilik baxsh etdi.

Unda viloyatimizdan besh, Namangan viloyatidan etti nafar ijodkorlarga a‘zolik guvohnomasi topshirildi. Farg‘onalik taniqli ijodkorlardan Tolibjon Ro‘ziboev, Adham Mirsaid, Akramjon Azizov, Mo‘‘tabar G‘ulomova, Ilhom Omon a‘zolik guvohnomasini qo‘lga oldilar.

Shundan so‘ng Andijon, Namangan va Farg‘ona yoshlari ijodiy bellashuvi boshlandi.

Farida Afro‘z, Zulfiya Mo‘minova, Shahodat Isaxonova, Qozoqboy Yo‘ldoshev, Saidjalol Saidmurodov, Masihullov Madaminov kabi o‘zbek adabiyotining peshqadam vakillari hakamlik qilgan mintaqaviy bosqich iste‘dodlarni kashf etish shukuhi ila yorqin lahzalarga boy bo‘ldi. Qizg‘in o‘tgan tanlov natijasida uch viloyat yoshlaridan nizomdagi yo‘nalishlarning har biriga bir nafardan ishtirokchi Zominga yo‘llanmani qo‘lga kiritdi. Mintaqaviy bosqichda qatnashgan barcha yigit-qizlarga maxsus sertifikat hamda kitoblar jamlanmasi topshirildi.

Ijodini ustozlar nazaridan o‘tkazgan yoshlarning eng iqtidorlilari endi an‘anaviy seminarning respublika bosqichiga yo‘l oladilar.