Sessiya ishida viloyatdan saylangan Oliy Majlis Senati a’zolari, viloyat Kengashi deputatlari, kun tartibiga kiritilgan masalalarga aloqador davlat va jamoat tashkilotlari rahbarlari ishtirok etdi. Ayrim viloyat Kengashi deputatlari onlayn tarzda qatnashdi. Dastlab viloyatda davlat fuqarolik xizmati sohasida islohotlarni yo‘lga qo‘yish, bu borada kadrlar siyosatini tizimli olib borish, keng dunyoqarashga ega, zamonaviy fikrlaydigan, yuqori mas’uliyatni his etadigan, fidoyi, sadoqatli va salohiyatli kadrlar salmog‘ini oshirish borasida amalga oshirilgan ishlar yuzasidan Davlat xizmatini rivojlantirish agentligi viloyat boshqarmasi boshlig‘i Ahadjon Akbarovning hisoboti tinglandi. Sessiyada shuningdek, “Davlat va jamoat ehtiyojlari uchun yer uchastkalarini olib qo‘yilishi munosabati bilan jismoniy va yuridik shaxslarga yetkazilgan zararlarni qoplash bo‘yicha” viloyat hududiy Kuzatuv Kengashining takliflari, 2030 yilga qadar O‘zbekiston Respublikasida gender tenglikka erishish strategiyasini 2025 yilda amalga oshirish bo‘yicha kompleks chora-tadbirlar dasturini ko‘rib chiqish va tasdiqlash kabi masalalar ham ko‘rib chiqildi. Sessiyada ko‘rib chiqilgan har bir masalalar yuzasidan Xalq deputatlari viloyat Kengashining tegishli qarorlari qabul qilindi.