Farg‘ona delegasiyasi Toshkent xalqaro investisiya forumida faol ishtirok etmoqda Toshkent shahrida IV Toshkent xalqaro investisiya forumi boshlandi. Forum doirasida mamlakatimizning investision salohiyatini namoyish etuvchi maxsus ko‘rgazma tashkil etildi. Unda mahalliy yirik kompaniyalar xalqaro investorlarga o‘z imkoniyat va loyihalarini taqdim etishmoqda. Shuningdek, panelь muhokamalari, ishbilarmonlik uchrashuvlari va hamkorlik muzokaralari ham o‘tkazilmoqda. Mazkur nufuzli anjumanlarda Farg‘ona viloyati delegasiyasi ham faol ishtirok etmoqda. Delegasiyaga viloyat hokimining o‘rinbosari Nuriddin Mamajonov rahbarlik qilmoqda. Forum doirasida Xitoy, AQSh, Germaniya va Rossiya kabi qator davlatlarning etakchi kompaniyalari bilan uchrashuvlar o‘tkazilib, Farg‘ona viloyatining mavjud imkoniyatlari va salohiyati haqida atroflicha ma‘lumot berildi. Energetika, infratuzilma, qishloq xo‘jaligi, sanoat, raqamli texnologiyalar kabi muhim yo‘nalishlardagi investision loyihalar taqdim etildi. Qurilish, turizm, zamonaviy texnologiyalardan samarali foydalanish, savdo-sotiq kabi yo‘nalishlarda amaliy muzokaralar olib borildi hamda o‘zaro manfaatli hamkorlik chora-tadbirlari yuzasidan kelishuvlarga erishildi. 12 iyunga qadar davom etadigan mazkur xalqaro forum doirasida dunyoning turli mamlakatlaridan tashrif buyurgan ishbilarmonlar bilan yana qator kelishuvlarga erishish va yangi aloqalarni yo‘lga qo‘yish ko‘zda tutilgan.