Farg‘onada nazorat qiluvchi organlar uchun seminar tashkil etildi Farg‘ona shahrida Biznes-ombudsman devoni va viloyat hokimligi hamkorligida nazorat qiluvchi organlar vakillari uchun seminar tashkil etildi. Tadbirda viloyatdagi 20 dan ortiq nazorat qiluvchi organlardan 350 nafarga yaqin xodimlar ishtirok etdi. Seminar davomida tadbirkorlik sub‘ektlarida tekshiruvlarni amalga oshirish tartibi, shuningdek, tekshiruvchilarning huquq va majburiyatlari bo‘yicha atroflicha tushuncha berildi. O‘zbekiston Respublikasi Prezidentining “Tadbirkorlar huquqlari va qonuniy manfaatlarini ishonchli himoya qilish chora-tadbirlari to‘g‘risida”gi farmoni ijrosi yuzasidan fikr almashildi. Shu bilan birga, tadbirkorlik faoliyatiga oid amaldagi qonunchilik hujjatlari va ularga kiritilgan so‘nggi o‘zgartishlar to‘g‘risida ham batafsil ma‘lumotlar taqdim etildi. Seminarda viloyatda tadbirkorlik muhitini yaxshilash, nazorat organlari faoliyatini takomillashtirish, ularning mas‘uliyatini oshirish hamda tadbirkorlar huquqlarini himoya qilish borasidagi chora-tadbirlarga alohida e‘tibor qaratildi. Ishtirokchilar o‘zlarini qiziqtirgan savollarga mutaxassislardan javoblar oldilar. Ikki kunlik seminar ertaga ham o‘z ishini davom ettiradi.