Dang‘arada maktabgacha ta‘lim muassasalari soni yana bittaga ko‘paydi Dang‘ara tumani Kunchiboy-qo‘rg‘oncha qishlog‘ida homiylik asosida qurilgan yangi maktabgacha ta‘lim muassasasi foydalanishga topshirildi. Tantanali ochilish marosimida viloyat hokimi Xayrullo Bozorov, viloyat prokurori Baxtiyor Ismoilov, tuman hokimligi mas‘ullari, mahalla faollari va yoshlar ishtirok etdilar. Ushbu hududda avval maktabgacha ta‘lim muassasasi mavjud emas edi. Tuman prokurori Akmaljon Boboxonov tashabbusi va homiylar ko‘magida Sanam MFYda 90 o‘rinli zamonaviy muassasa barpo etildi. Qurilish ishlariga 3,2 milliard so‘mdan ortiq homiylik mablag‘lari yo‘naltirildi. Natijada mahalladagi maktabgacha yoshdagi bolalarni to‘liq qamrab olish imkoniyati yaratildi. Tadbirda viloyat hokimi Xayrullo Bozorov mamlakatimizda maktabgacha ta‘lim tizimida amalga oshirilayotgan islohotlar yosh avlodning barkamol rivojlanishi va kelajagiga xizmat qilishini ta‘kidladi. Shuningdek, mazkur bunyodkorlik aholi hamjihatligi va homiylar tashabbuskorligining yorqin namunasi ekani qayd etildi. Ta‘kidlanganidek, viloyatda maktabgacha ta‘lim qamrovini 90-95 foizga etkazish bo‘yicha izchil ishlar davom ettiriladi. Ramziy tasma kesilib, ishtirokchilar muassasada yaratilgan shart-sharoitlar bilan yaqindan tanishdilar.