Farg‘onada Germaniya mehnat bozori uchun malakali mutaxassislar tayyorlanadi Farg‘ona viloyati hokimi Xayrullo Bozorov Berlin shahrida “Simson Private Akademie” rahbari Maks Roymshussel bilan uchrashuv o‘tkazdi. Suhbat chog‘ida viloyatimizda Germaniya mehnat bozori talablariga mos malakali mutaxassislar tayyorlash masalalari muhokama qilindi. Muzokaralar yakunlari asosida Farg‘ona shahrida mazkur akademiya ko‘magida kasb-hunarga o‘qitish markazini tashkil etish va unda ta‘lim olgan yoshlarni Germaniyada ishga joylashtirish bo‘yicha kelishuvga erishildi. Shuningdek, “GfM group” kompaniyasi direktori Mattias Freyling bilan o‘tkazilgan uchrashuvda ham yoshlarni Germaniyada talab yuqori bo‘lgan kasblarga tayyorlash masalalari muhokama qilindi. Viloyatimizda faoliyat yuritayotgan “Wegweiser” o‘quv markazi bilan hamkorlikda yoshlarni kasb-hunarga o‘qitish va ularni xorijda ish bilan ta‘minlash bo‘yicha kelishuvlarga erishildi. Uchrashuvlar yakunida Farg‘ona viloyati hokimligi, “Simson Private Akademie”, “GfM group” va “Erfurt Bildungszentrum” (EBZ)kompaniyalari o‘rtasida anglashuv memorandumi imzolandi.