Xitoylik investor Farg‘ona davlat texnika universiteti bilan hamkorlikda qator loyihalarni amalga oshiradi Viloyat hokimi Xayrullo Bozorov Xitoyning "SHANDONG DAFENG NIAO" kompaniyasi vakili Sao Shanlinni qabul qildi. Uchrashuvda mazkur kompaniya tomonidan Farg‘ona davlat texnika universiteti bilan hamkorlikda amalga oshirilishi rejalashtirilayotgan istiqbolli loyihalar muhokama qilindi. Kompaniya Farg‘ona davlat texnika universitetida 3 ta yo‘nalishda loyihalarni amalga oshirishni rejalashtirgan. Qishloq xo‘jaligiga oid ilg‘or yangi texnologiyalarni ishlab chiqarishni yo‘lga qo‘yish, mazkur soha mutaxassislarini o‘qitish hamda Shanьdun provinsiyasidagi Shefan universiteti professorlari hamkorligida xitoy tilidan dars berish, shuningdek, ekskavatorlar uchun ehtiyot qismlari ishlab chiqarish loyihasi ham amalga oshiriladi. Kompaniya vakili shular xususida ma‘lumot berdi. Viloyat rahbari taqdim etilgan loyihalarni qo‘llab-quvvatlashga tayyor ekanini bildirib, eng avvalo zamonaviy va ilg‘or texnologiyalar asosida ishlab chiqarishni tashkil etish, shu orqali yangi ish o‘rinlari yaratish muhim maqsadlardan biri ekanini alohida ta‘kidladi. Yakunda istiqbolli loyihalarni qisqa fursatlarda amalga oshirish belgilab olindi. Uchrashuvda Farg‘ona davlat texnika universiteti rektori O‘ktam Salomov ham ishtirok etdi.