Хусусан, “Янги ҳаёт” МФЙ ҳудудидаги 600 ўринли “Eljas school” хусусий мактабидаги таълим жараёнлари ва яратилган шароитлар кўздан кечирилди. Ушбу таълим масканига 12 миллиард сўм инвестиция йўналтирилган бўлиб, 1-синфдан 11-синфгача бўлган ўқувчилар учун зарур барча имкониятлар яратилган. Мактабда 50 нафар малакали ўқитувчилар ва мураббийлар фаолият олиб бормоқда. Шунингдек, ўқувчиларни мактабга олиб келиш учун махсус автобус қатнови йўлга қўйилган, узоқдан келадиганлар учун ётоқхона ҳам мавжуд. Кейинги манзил "Sherwood kids" номли нодавлат мактабгача таълим ташкилоти бўлди. Тадбиркор Шерзод Эркабоев ташаббуси билан очилган боғчага 3 миллиард сўм инвестиция йўналтирилган бўлиб, 200 нафар болажонни қамраб олиш имконияти мавжуд. Замонавий таълим ва тарбия жараёнлари учун барча зарур шароитлар яратилган. Мулоқотда тадбиркор келгусидаги режалари ҳақида ҳам маълумот берди. Вилоят ҳокими Хайрулло Бозоров мазкур таълим ва тарбия муассасалари фаолиятини юқори баҳолаб, бундай мактабларнинг ҳудудда таълим сифатини ошириш ва ёшлар тарбиясидаги аҳамиятини алоҳида таъкидлади. Шу куни туман Маданият марказида ташкил этилган IT маркази фаолияти ҳам кўздан кечирилди. Айни пайтда мазкур марказда 60 нафар бола, шу жумладан, 20 нафар кам таъминланган оила фарзанди ахборот технологиялари сирларини ўрганмоқда. Шунингдек, қўшимча инглиз тили курслари йўлга қўйилган бўлиб, дарслар икки сменада олиб борилмоқда. Марказда карикатура галереяси ҳам фаолият юритмоқда. Ташаббускор карикатурачи рассом Маҳмуджон Эшонқулов ўз ижодий ишларини меҳмонлар эътиборига ҳавола этди. Вилоят ҳокими билан мулоқотда музейни кенгайтириш ва ёшлар учун янада қулай шароит яратиш зарурлиги қайд этилди. Шодликобод МФЙ ҳудудида тадбиркор Ойбек Мирзақулов ташаббуси билан аҳолига тиббий хизмат кўрсатишни ташкил этиш лойиҳаси амалга оширилмоқда. Унинг олд қисмида савдо ва маиший хизмат кўрсатиш комплекси ҳам ташкил этилади. Лойиҳа қиймати 10 млн доллар бўлиб, 360 ўринга мўлжалланган. Мазкур марказ жорий йил якунида ишга туширилиши режалаштирилган.